Rom 10 | SGZ | STEP | Rang buhang, ngádáh ina ngo on ngoi i di á matananu Israel? A lala bop i balang mam di, má iau lu sung uri narsá Káláu ngo da atur páptai araliu káián ái Káláu.

a 10:5Him 18:5

b 10:6-9Nag 30:12-14

c 10:11Ais 28:16

d 10:12Apo 15:9

e 10:13Ioe 2:32

f 10:15Ais 52:7

g 10:16Ais 53:1

h 10:18Sak 19:4

i 10:19Nag 32:21

j 10:20Ais 65:1

k 10:21Ais 65:2

Romans 10

1 Rang buhang, ngádáh ina ngo on ngoi i di á matananu Israel? A lala bop i balang mam di, má iau lu sung uri narsá Káláu ngo da atur páptai araliu káián ái Káláu. 2 Iau apapos uri di ngo di lala kákir taladeng ngoromin. Di lu tohoi suri agasgas pasi bál ái Káláu. Di lala tohoi ngorer, ái sár kápdite talas kuluk uri táit a nem on ái Káláu. 3 Áá, kápdite mák ilmi sál káián ái Káláu suri long anokwa di i mátán, má ngorer dik ser sál kándi sang suri da nokwan. Má pasi á ngorer kápdite rusan tar di uri sál ái Káláu ákte pepla páksi. 4 Dik hol on ngo ái Káláu na mák anokwa pas di kabin di mur i nagogon. Ái sár ái Karisito á kurtángsin nagogon, má ngorer a amutái sál án nagogon suri long anokwai kálámul, suri ngorer sinih na ruruna i Karisito, ái na nokwan pagas i mátán ái Káláu.

Sinih ái Konom na aliu pasi?

5 ^aÁi Moses a le suri sál er án anokwai kálámul kabin a mur i nagogon mák parai ngoromin,

“Koner a mur arwat pas noi nagogon,
ái na atur páptai araliu.”
6 ^bMá Buk Tabu a parai mul suri sál án anokwai kálámul kabin a ruruna, er a parai ngo

“Koion á tekes na hol on imi bál ngo,
‘Araliu a lala tepák, pasi inak tapam urami bát inak ser suri.’”
A sálán ngoromin. Tekes na tapam urami suri nák long pas Karisito ur main i bim suri na aliu pas git.

7 “Má koion á tekes na hol on ami bál ngo,
‘Araliu a lala tepák, ngorer inak sosih uradi tarang án minat inak ser suri.’”
Má a sálán ngo tekes na sosih uradi suri long pas Karisito nák aliu pas git. Koion da parai ngorer kabin ái Karisito ákte sosih má mai araliu tilami bát, má ákte kaleng má tili minat, má ákte arbin má narsá git.

8 Ái sár gama hol on ngorer i Buk Tabu a parai ngo,

“Midán ái Konom erei sár pátum gam,
imi ngus gam ái, má erei i bál gam mul.”
Má ái á aratintin suri ruruna gim lu arbin mai. 9 A ngoromin. Sinih na para aposoi mai ngudun ngo ái Iesu ái á Konom, má na ruruna ami bál sang ngo ái Káláu a aptur kalengnai tili minat, kálámul er ái Káláu na aliwi. 10 Git ruruna mai bál git ngo ái Karisito ákte mat mái Káláu ákte aptur kalengnai, má ngorer ái Káláu a mák anokwa pas git ngo git nokwan i mátán. Má git para aposoi mai ngus git ngo ái Iesu ái á Konom, má ngorer ái Káláu a aliu pas git. 11 ^cA ngorer a parai i Buk Tabu ngo,

“Ái koner a atri kán ruruna on,
ái kápnate tabureng i bál.”
12 ^dMái Káláu kápate mák git ngo git aru matngan kálámul, ngo te tili git á rung til Iudáiá má te rung tili risán, kápte. Git no er git ruruna on, a tukes sár á kángit Konom, wa Konom Sur Noi mái koner kán arasosah a káng ungleu ur si di no di sung pasi kán artangan. 13 ^eBuk Tabu a parai ngo,

“Sinih na sung Konom suri na tángni,
ái Konom na aliu pasi sang.”
14 Mái sár ngádáh da sungi ngoi ái koner kápdite ruruna on? Má ngádáh da ruruna on ngoi á tekes kápdite longrai arbin ur on? Má ngádáh da longrai ngoi ngo kápte kes a arbin narsá di? 15 ^fMá ngádáh tekes na arbin ngoi ngo ái Káláu kápate tarwai? A ngorer i Buk Tabu a parai ngo,

“A tuan kuluk sang á kándi purpurut
ái rung er di kipi lain arbin.”
16 ^gA talas uri narsá git ngo matananu Israel dikte longrai á lain arbin si Káláu, ái sár kápdite marán ái rung di taram on. Tám worwor tus ái Aisaia a parai sur di ngo,

“Konom, ái sinih ákte ruruna i midam gim kipi?”
17 Io, matananu di ruruna i Karisito kabin dikte longrai lain arbin ur on, má dikte longrai arbin er kabin kes ákte arbin mai narsá di.

18 ^hKi ngádáh? Matananu Israel kápdite longrai á lain arbin, be? Auh, kápte. Dikte longrai má! Mákái erei i Buk Tabu a parai ngo,

“Kaungán tan táit a apapos sur Káláu
ákte han arkaliut uri tan kuir no i naul bim,
má pinpidan di parai
ákte tangrai bos malar tepák taladeng.”
19 ⁱMá ngádáh, matananu Israel dikte longrai má kápate talas uri narsá di, be? Auh, kápte mul! Ái Moses, ái ái koner a mulán parai suri rung tili risán da kipi nián matananu Israel. A parai worwor si Káláu ngoromin ngo,

“Ina asosah i di ái rung tili risán erei gam mák di ngo di tu táit bia,
má gamák bálsák mam di.
Má gama togor mam di
ái rung gam pua di ngo káp kándi te mánán sur iau.”
20 ^jMá namur a mangan ái Aisaia mai worwor suri rung tili risán mák parai ngo,

“Dikte mák pas iau
ái rung kápdite ser sur iau,
má iakte para talsa iau sang
si rung kápdite gálgálta sur iau.”
21 ^kMá namur ái Aisaia a worwor mul mák parai suri matananu Israel ngo,

“Tan bung no iakte kalkaluh sur rung erei di kulkulut,
má a laklak i bál di.”